काठमाडौं । नेपाल प्रिमियर लिग (एनपीएल) क्रिकेटमा चितवन राइनोजले लगातार दोस्रो जित निकालेको छ ।
त्रिवि क्रिकेट मैदानमा चितवनले पोखरामाथि ८७ रनको प्रभावशाली जित दर्ता गर्यो । चितवनले दिएको १ सय ६२ रनको लक्ष्य पछ्याएको पोखरा १३ दशमलव २ ओभरमा ७४ रनमा अलआउट हुन पुग्यो । सोएल तन्भिर र रिजन ढकालले धारिलो बलिङ गर्दै एकै ओभरमा तीन तीन विकेट लिएपछि पोखराको ब्याटिङ धराशायी बनेको थियो ।
क्याप्टेन कुशल भुर्तेल र बास डी लिड गोल्डेन डकआउट भए भने भिचेल लिस्कले पनि खातै खोल्न पाएनन् । दिलिप नाथ चार रनमा आउट हुँदा निदेश खरेल, किरण ठगुन्ना र रेमन रेइफरले एकएक रन जोडे ।
यसअघि पोखराले टस जितेर फिल्डिङ रोजेपछि ब्याटिङ गरेको चितवनले निर्धारित ओभरमा ७ विकेट गुमाएर १ सय ६१ रन बनाएको थियो।
प्रतिक्रिया