एनपीएलको ‘पावर्ड बाई’ साझेदारको रुपमा एनसेल आबद्ध

काठमाडौं। आगामी मंसिर १५ देखि हुने नेपाल प्रिमियर लिग (एनपीएल) २०२४ मा मोबाइल सेवाप्रदायक कम्पनी एनसेल ‘पावर्ड बाई’ साझेदारको रूपमा आबद्ध भएको छ।

यसका लागि गत साता एनसेलका प्रबन्ध निर्देशक तथा प्रमुख कार्यकारी अधिकृत जाब्बोर कायुमोभ र क्यानका सचिव पारस खड्काले समझदारीपत्रमा हस्ताक्षर गरेका थिए। यो सहकार्य एनसेलको ‘हामी तपाईंकै लागि’ थिम र नेपालमा क्रिकेट तथा खेलकुदको विकासलाई सहयोग गर्ने प्रतिबद्धतामा आधारित रहेको एनसेलले जनाएको छ।

मंसिर १५ देखि पुस ६ सम्म नेपालमा सञ्चालन हुने प्रतियोगितामा आठ टिमका १६० खेलाडी कुल ३२ रोमाञ्चक खेलमा समावेश हुनेछन्। सबै खेल कीर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा आयोजना गरिनेछ।

आठ टिमले राउन्ड–रोबिन फर्माटमा प्रतिस्पर्धा गर्नेछन्, जसमा प्रमुख सहर विराटनगर, चितवन, जनकपुर, कर्णाली, काठमाडौं, लुम्बिनी, पोखरा र सुदूरपश्चिमलाई प्रतिनिधित्व गर्ने टिम छन्।