घटस्थापनाका अवसरमा गोरखा दरबारको दशैंघरमा विधिपूर्वक राखियो जमरा

गोरखा । नवरात्रको पहिलो दिन घटस्थापनाका अवसरमा गोरखा दरबारको दशैंघरमा विधिपूर्वक जमरा राखिएको छ ।

मूलदरबारस्थित दशैंघर, कालिका र गोरखनाथ मन्दिरमा बिहान ९ः१६ बजेको साइतमा जमरा राखिएको हो । परम्पराअनुसार बिहान सबेरै गोरखकाली मन्दिरको कैलाश कोठाबाट देवी भगवतीलाई मूल दरबारको गर्भगृह (पूजाकोठा) मा पदस्थापना गराइ पानी घडा थापेर जमरा राखिएको मन्दीर प्रशासनले जनाएको छ ।

यहाँ जमरा राखेपछि मात्र देशभरका हिन्दू धर्मावलम्बीले घरघरमा जमरा राख्छन् भन्ने मान्यता रहँदै आएको छ । प्रतिपदा सुरु भएसँगै कालिका मन्दिरमा नियमित कालो बोकाको बलि दिने प्रचलन छ ।

घटस्थापनाको दिन राखिएको जमरा विजयादशमीको दिन टीकासँगै लगाउने गरिन्छ ।