बाढी र पहिरोमा परि मृत्यु हुनेको संख्या १ सय ७० पुग्यो, ४२ अझै बेपत्ता

काठमाडौं । गएको बिहीबारदेखि परेको अविरल बर्षापछि आएको बाढी र पहिरोमा परि मृत्यु हुनेको संख्या १ सय ७० पुगेको छ ।

प्रहरीले दिएको जानकारी अनुसार विपद्मा परि हालसम्म पनि ४२ जना बेपत्ता रहेका छन् । यस्तै १ सय ११ जना घाइते भएको प्रहरी प्रधान कार्यालयले जानकारी दिएको छ । बाढी, पहिरोपछिको खोज, उद्धार र राहतका लागि सबै सुरक्षा निकाय परिचालित भई हालसम्म करिब चार हजार विपद् प्रभावितको उद्धार गरिएको छ ।

काभ्रेपलाञ्चोक, सिन्धुली र ललितपुरलगायत जिल्लाका विभिन्न स्थानबाट घाइते र अलपत्र परेका एक सय ६२ जनालाई नेपाली सेनाको हेलिकप्टरमार्फत उद्धार गरिएको छ ।

बाढी पहिरो प्रभावितलाई खाद्यान्नलगायत आपत्कालीन राहत सामग्री उपलब्ध गराइएको तथा घाइतेहरूको सरकारी अस्पतालमा निःशुल्क उपचार भइरहेको प्रहरीले जनाएको छ ।