झ्याप्लेखोला पहिरो अपडेटः हालसम्म ३० जनाको शव निकालियो

धादिङ । धादिङको झ्याप्लेखोलामा पुरिएर मृत्यु हुनेको संख्या ३० पुगेको छ ।

प्रहरीका अनुसार हिजो एउटा माइक्रोबसबाट १४ जनाको शव निकालिएको थियो । आज एउटा बसबाट तीन जनाको शव र अर्को माइक्रोबसबाट १३ जनाको शव फेला परेको जनाएको छ । गोरखाबाट काठमाडौंका लागि छुटेको ना ४ ख २२७० नम्बरको यात्रुवाहक बसबाट आज तीन जनाको शव निकालिएको छ ।

यस्तै चितवनबाट काठमाडौं आउँदै गरेको बा ३ ज १३४५ नम्बरको माइक्रोबसमा १३ जनाको शव फेला परेको छ । यो माइक्रोबसबाट चार जना महिला र नौ जना पुरुषको शव निकालिएको छ । यस्तै बुटवलबाट काठमाडौंका लागि छुटेको लु १ ज ४५७८ नम्बरको माइक्रोबसलाई पनि झ्याप्ले खोलाको पहिरोले पुरेको थियो ।

यो माइक्रोबसमा रहेका १४ जनाको शव हिजो नै निकालिएको थियो । उक्त पहिरोमा अझै पनि केही बस र गाडीहरु पुरिएको हुनसक्ने आशंका व्यक्त गरिएको छ ।