एजेन्सी । बंगलादेशका स्टार अलराउन्डर सकिब अल हसनले टेस्ट र टी–२० आई क्रिकेटबाट सन्न्यासको घोषणा गरेका छन् ।
उनले घरेलु मैदानमा आगामी अक्टोबरमा दक्षिण अफ्रिकासँग हुने दुई टेस्ट खेलको सिरिजपछि नखेल्ने घोषणा गरेका हुन् । भारत भ्रमणमा रहेका उनले पत्रकारहरुसँगको कुराकानीमा सन्यास लिएको जानकारी दिएका हुन् । भारत र बंगलादेशबीच दोस्रो टेस्ट शुक्रबारदेखि कानपुरमा सुरु हुँदैछ ।
३७ वर्षीय उनले बंगलादेशबाट ७० टेस्ट, २४७ ओडीआई र १२९ टी–२० आई खेल खेलेका छन् । टेस्टमा उनले सन् २००७ मे १८ मा भारतविरुद्ध डेब्यू गरेका थिए । टेस्टमा उनले ५ शतक र ३१ अर्धशतकसहित कुल ४६०० सय रन बनाउनुको साथै २४२ विकेट लिएका छन् । २०१७ मा न्युजिल्यान्डविरुद्ध बनाएको २१७ रन नै उनको टेस्ट करिअरको उत्कृष्ट ब्याटिङ हो ।
टी–२० आईमा भने उनले २००६ मा जिम्बावेविरुद्ध डेब्यू गरेका थिए । उनले टी–२० आईमा २५५२ रन बनाउनुको साथै १४९ विकेट लिएका छन् ।
प्रतिक्रिया