एजेन्सी । उरुग्वेली फुटबल खेलाडी लुइस स्वारेजले अन्तर्राष्ट्रिय फुटबलबाट सन्न्यास लिने मंगलबार घोषणा गरेका छन् ।
विश्वकप–२०२६ छनोटको शुक्रबार पाराग्वेविरुद्ध मोन्टेभिडियोमा हुने खेल उनको उरुग्वेका लागि अन्तिम प्रतिस्पर्धा हुनेछ । पत्रकार सम्मेलनमा ३७ वर्षीय स्वारेजले भावुक हुँदै भनेका छन्, ‘शुक्रबारको खेल मेरो देशका लागि अन्तिम प्रतिस्पर्धा हुनेछ । यो निर्णय गर्न मलाई सजिलो रहेन् ।
तर यो अन्तिम खेलमा म पनि आफूले सक्दो राम्रो खेल्नेछुं ।’ बार्सिलोना र लिभरपुलका पूर्वखेलाडी स्वारेज उरुग्वेली फुटबलका सफलतम खेलाडीमा गनिन्छन् । उनले उरुग्वेका लागि अहिलेसम्म १ सय ४२ खेलमा ६९ गोल गरिसकेका छन् । सन् २००७ मा उनले आफ्नो राष्ट्रिय टिमका लागि डेब्यु गरेका थिए ।
सन् २०१४ को विश्वकपमा इटालीका खेलाडी जर्जिओ चिलेनीलाई टोकेपछि चार महिनाको प्रतिबन्ध लगाइएको थियो । अहिले उनी अमेरिकामा इन्टर मायामीका लागि खेलिरहेका छन् ।
सन् २०११ मा उरुग्वेले कोपा अमेरिका जितेको थियो र त्यसमा स्वारेज प्रतियोगिताकै उत्कृष्ट खेलाडी घोषित भएका थिए ।
प्रतिक्रिया