लेदोसहितको पहिरोले नौबिसे–मलेखु सडकखण्ड अवरुद्ध

धादिङ । पृथ्वी राजमार्गअन्तर्गत धादिङको गजुरी गाउँपालिका–६ बेल्खुमा पहिरो जाँदा राजमार्ग अवरुद्ध बनेको छ।

सडक माथिबाट लेदो सहितको पहिरो झर्दा राजमार्गमा दुईतर्फी सवारी आवागमन बन्द भएको हो। पहिरो पन्छाउन केही समय लाग्ने ट्राफिक प्रहरीले जनाएको छ। पहिरोको कारण काठमाडौं प्रवेश गर्ने र बाहिरिने सयौं सवारी रोकिएका छन्। निर्माणाधीन सडकमा बेलाबेला पहिरो झरेर बाटो अवरुद्ध हुने गरेको छ।

लगातार वर्षासँगै लेदो सहितको पहिरो खसेर सडक अवरुद्ध भएको ट्राफिक प्रहरीले जनाएको छ। लगातार वर्षा भएका कारण पहिरो पन्छाउन समस्या भएको र पहिरो पन्छाउने काम सुरु गरेको ट्राफिक प्रहरीले जनाएको छ।