विश्वकै सबैभन्दा बढी उमेरकी महिलाको निधन

एजेन्सी । विश्वकै बढी उमेरकी महिलाको मंगलबार निधन भएको छ ।

अमेरिकामा जन्मिएकी मारिया ब्रानयास मोरेराको १ सय १७ वर्षको उमेरमा निधन भएको हो । सीएनएनकाअनुसार गिनिज वर्ल्ड रेकर्ड्स (जीडब्लूआर)ले विज्ञप्ति जारी गर्दै मोरेराको १ सय १७ वर्ष १ सय ६८ दिनको उमेरमा निधन भएको जनाएको हो । जीडब्लूआरका अनुसार उनि विश्वमा सबैभन्दा लामो समय बाँच्नै आठौं व्यक्ति हुन् ।

२०२३ को जनवरीमा विश्वकै सबैभन्दा बढी उमेरकी १ सय १८ वर्षीया सिस्टर आन्द्रेको निधनपछि मोरेरा विश्वकै सबैभन्दा बढी उमेरकी घोषित भएकी थिइन् । मोरेराको जन्म उनको परिवार स्पेनबाट अमेरिका बसाईं सरेको एक वर्षपछि १९०७ मार्च ४ मा भएको थियो । त्यसको ८ वर्षपछि उनको परिवार स्पेनको बार्सिलोना फर्केको थियो ।

पछिल्लो समय भने उनि स्पेनको क्याटालोनियामा बस्दै आएकी थिइन् । उनि कोभिड १९ को संक्रमणबाट निको हुने सबैभन्दा बढी उमेरकी मानिससमेत रहेकी थिइन् ।