आज यी चार प्रदेशमा भारी बर्षाको सम्भावना

काठमाडौं । हाल देशभर मनसुनी वायुको प्रभाव रहेको छ।

मनसुनको न्यूनचापीय रेखा सरदर स्थानको आसपास नै रहेको जल तथा मौसम विज्ञान विभागले जानकारी दिएको छ। अहिले बिहान देशभर साधारणतया बदली रहेको छ। मधेश, बागमती र गण्डकी प्रदेशका केही स्थानहरूमा हल्कादेखि मध्यम वर्षा हुनुका साथै कोशी, लुम्बिनी र कर्णाली प्रदेशका थोरै स्थानहरूमा हल्का वर्षा भइरहेको छ।

बुधबार दिउँसो देशभर साधारणतया बदली रहने छ। सबै प्रदेशका केही स्थानहरूमा मेघ गर्जन र चट्याङसहित हल्कादेखि मध्यम वर्षाको सम्भावना रहेको छ। कोशी, बागमती, गण्डकी र लुम्बिनी प्रदेशका एक–दुई स्थानमा भारी वर्षाको पनि सम्भावना छ। राति देशभर आंशिकदेखि साधारणतया बदलीको सम्भावना छ।

बागमती र गण्डकी प्रदेशका केही तथा बाँकी प्रदेशका थोरै स्थानहरूमा मेघ गर्जनरचट्याङसहित हल्का देखि मध्यम वर्षाको सम्भावना रहेको छ। यस्तै पछिल्लो २४ घण्टामा सिराहाको लहानमा ८७ दशमलव २ मिलिमिटर वर्षा भएको छ। मोरङको केराबारीमा ७५ दशमलव २ मिलिमिटर वर्षा भएको छ।

मकवानपुर गढीमा ६० दशमलव ८, काठमाडौंको धापा ड्याममा ६९, चितवनको त्रिशूलीमा ७४, चितवनकै झुवनीमा ७४ दशमलव ८, लमजुङको कुञ्चामा ७२ दशमलव ४, गोरखाको आरुघाट ७६ मिलिमिटर पानी परेको छ।