हिल्टन होटलको छतमा हेलिकप्टर ठोक्किँदा पाइलटको मृत्यु, २ पर्यटक घाइते

एजेन्सी । सोमबार बिहान स्थानिय समय अनुसार साढे एक बजे अष्ट्रेलियाको क्वीन्सल्याण्डस्थित उत्तरी सहर केर्न्समा रहेको हिल्टन होटलको छतमा हेलिकप्टर ठोक्किँदा पाइलटको मृत्यु भएको छ ।

यस्तो हेलिकप्टर दुर्घटनामा परि होटलमा रहेका दुई पर्यटक समेत घाइते भएको अन्तर्राष्ट्रिय सञ्चारमाध्यम हरुले जनाएका छन् । घाइते हुनेमा ८० वर्षिय बुद्ध, ७० वर्षीया महिला रहेको र उपचारका लागि उनीहरुलाई अस्पताल लगिएको छ । उनीहरुको अवस्था भने अहिले सामान्य रहेको बताइएको छ ।

हेलिकोप्टर छतमाथि खस्दा होटलमा ठूलो आगलागी भएको र होटलमा रहेको सयौँ पाहुनालाई तत्काल बाहिर निकाल्न सफल भएको जनाइएको छ । क्वीन्सल्याण्ड प्रहरीले हेलिकप्टरका पाइलटको घटनास्थलमै मृत्यु भएको पुष्टि गरेको छ । अष्ट्रेलियन ब्रोडकास्टिङ कर्पोरेसन(एबीसीका) अनुसार हेलिकप्टरका दुईवटा रोटर ब्लेडहरू बाहिर आएपछि अनियन्त्रित भइ होटलको छतमा खसेको पनि अष्ट्रेलियाको यातायात सुरक्षा ब्यूरोले घटनास्थलमा अनुसन्धानकर्ताहरू पठाएको जनाएको छ ।

अनुसन्धानकर्ताहरूले अनुसन्धान सुरु गरेको बताइएको छ ।