मेलम्चीमा बाढी, बगायो अस्थायी पुल

मेलम्ची । अविरत बर्षासँग मेलम्ची खोलामा आएको बाढीले अस्थायी पुल बगाएको छ ।

आइतबार रातिदेखिको वर्षाका कारण सिन्धुपाल्चोकको मेलम्ची नगरपालिका–११ स्थित फट्टेमा रहेको अस्थायी पुल बगाएको हो । २०७८ को बाढीले पुल बगाएपछि ह्युम पाइप राखेर अस्थायी पुल बनाइएको थियो सोही पुल पनि आइतबार राति आएको बाढीले बगाएको छ । पुल बगाउँदा वडाभित्र नै एक गाउँबाट अर्को गाउँ जान अहसज भएको छ। ह्युम पाइप क्षति भएसँगै मेलम्ची–९ दुवाचौर , केउरानी , बरुवा, बाँसखर्कलगायतमा यातायात सञ्चालनमा कठिनाइ भएको छ।

पुल बगाएपछि ती ठाउँहरूमा जान थप १५ किलोमिटर घुम्नुपर्ने अवस्था रहेको छ । जल तथा मौसम विज्ञान विभागका अनुसार सिन्धुपाल्चोकको ढुंगेमा पछिल्लो १२ घन्टा १ सय ५९ मिलिमिटर पानी परेको छ।