दुई हजारभन्दा बढी किसानलाई उन्नत बीउमा अनुदान

चितवन । भरतपुर महानगरपालिकामा रहेका दुई हजारभन्दा बढी किसानलाई उन्नत बीउमा अनुदान सहयोग गरिएको छ ।

महानगरपालिकाका ७० वटा सहकारीमा आबद्ध दुई हजार दुई सय ३६ किसानलाई उन्नत गहुँ र तोरीको बीउ अनुदानमा वितरण गरिएको महानगर कृषि शाखा प्रमुख तेजेन्द्रप्रसाद पौडेललले जानकारी दिए । उनका अनुसार ३४ सहकारी समूहका ९ सय ६९ र ३६ सहकारीका १ हजार २ सय ९७ किसानले तोरीको उन्नत बीउ पाएका छन् ।

करेसाबारीका लागि हिउँदे र वसन्ते तरकारी बीउका दुई/दुई हजार किट र एउटा परिवारका लागि गहुँको बीउमा प्रतिकिलो रु एक सय र तोरीको बीउमा प्रतिकिलो रु ३० अनुदान दिइएको महानगरले जनाएको छ । अघिल्ला वर्षमा धान र मकैको बीउ अनुदान दिइएको तर यस वर्ष भने बजेट अभावका कारण गहुँ र तोरीको बीउमात्रै उपलब्ध गराइएको उनको भनाई छ ।

यसले किसानलाई ठूलो सहयोग पुगेको प्रमुख पौडेल बताउँछन् ।