स्वदेश फर्किए कतारका राजा थानी

काठमाडौं । करिब २२ घण्टाको नेपाल बसाई पछि कतारका अमिर शेख अल थानी स्वदेश फर्किएका छन् ।

मंगबार दिउँसो नेपाल ओर्लिएका थानी बुधबार दिउँसो झन्डै १ः३० बजेको समयमा स्वदेश फर्किएका हुन् । उनलाई राष्ट्रपति रामचन्द्र पौडेल, उपराष्ट्रपति रामसहाय प्रसाद यादव र प्रधानमन्त्री पुष्पकमल दाहाल प्रचण्डले त्रिभुवन अन्तर्राष्ट्रिय विमानस्थलमा विदाइ गरे ।

सो अवसरमा नेपाली सेनाको टोलीले सलामी अर्पण गरेको थियो । राष्ट्रपति पौडेलको औपचारिक निमन्त्रणामा थानी राजकीय भ्रमणका लागि मंगलबार काठमाडौं आएका थिए । उनको स्वागतमा पनि राष्ट्रपति, उपराष्ट्रपति र प्रधानमन्त्री विमानस्थलमा पुगेका थिए । उनले सोही दिन राष्ट्रपति पौडेललाई भेटेका थिए ।

बुधबार बिहान प्रधानमन्त्री पुष्पकमल दाहाल प्रचण्डले उनीसँग भेटवार्ता गरेका थिए । कतारका अमिरको नेपाल भ्रमणका क्रममा नेपाल–कतारबीच विभिन्न ८ क्षेत्रमा सहकार्य गर्ने समझदारी पत्रमा हस्ताक्षर भएको छ ।