अफगानिस्तानमा शक्तिशाली भूकम्प: दुई सय जनाको मृत्यु

काठमाडौं । अफगानिस्तानको हेरात प्रान्तमा गएको शक्तिशाली भूकम्पमा परि कम्तिमा पनि २ सय जनाको ज्यान गएको छ ।

शनिबार राती गएको ६.३ रेक्टर स्केलको भूकम्पमा परि २ सय बढिको ज्यान गएको र हजारौँ घाइते भएका अधिकारीले जानकारी दिएका छन् । बीबीसी हिन्दीका अनुसार भूकम्पका कारण भत्किएका भवनको भग्नावशेषमा धेरै मानिस दबिएका छन् । विपद् व्यवस्थापन प्रमुखले एक हजार जना घाइते भएको जानकारी दिएका छन् ।

धेरै गाउँहरु पूर्ण रुपमा ध्वस्त भएका छन् । शक्तिशाली भूकम्पपछि लामो समयसम्म भूकम्पको धक्का महसुस भइरहेको छ । भूकम्पले इरानसँगको सीमा नजिकै रहेको हेरात सहरका भवनमा क्षति पुगेको छ ।

गएको बर्षको जुनमा गएको भूकम्पमा १ हजार भन्दा बढिले ज्यान गुमाएका थिए । राहत तथा उद्धारको काम तीव्र गतिमा भइरहेको पनि अधिकारीले जनाएका छन् ।