३० जनालाई प्रतिवादी बनाएर जिल्ला अदालत काठमाडौंमा मुद्दा दर्ता

काठमाडौं । नक्कली भुटानी शरणार्थी प्रकरणमा जिल्ला सरकारी वकिल कार्यालय काठमाडौंले जिल्ला अदालत काठमाडौंमा अभियोजन दर्ता गराएको छ ।

प्रहरीले अनुसन्धान गरेर बुझाएको प्रतिवेदनका आधारमा बुधबार अपरान्ह सरकारी वकिल कार्यालयले नेपाली नागरिकलाई भुटानी शरणार्थी बनाएर अमेरिका लैजाने ठगी प्रकरणमा ३० जनालाई प्रतिवादी बनाइ अभियोग पत्र दायर गरेको हो । आरोपिहरु विरुद्द ठगी, सरकारी कागजात कीर्ते, राष्ट्रहित विरुद्धको कसूर र संगठित अपराध मुद्दामा कारबाही गर्न माग सहित मुद्दा दर्ता गरिएको सरकारी वकिलकोक कार्यालयले जनाएको छ ।

यो प्रकरणमा नेकपा एमालेका निलबित सचिव तथा प्रतिनिधिसभा सदस्य टोपबहादुर रायमाझी, कांग्रेस नेता बालकृष्ण खाँण, पूर्वसभासद आङटावा शेर्पा, गृह मन्त्रालयका तत्कालिन सचिव टेकनारायण पाण्डे, तत्कालिन गृहमन्त्री रामबहादुर थापाका सुरक्षा सल्लाहकार इन्द्रजित राईलगायत ३० जनाविरुद्ध मुद्दा दर्ता गरिएको हो ।

मुद्दा दर्ता गरिएकामध्ये १६ जना पक्राउ परेका छन् भने १४ जना फरार छन् । फरार रहेकाहरुलाई प्रहरीले खोजि गरिरहेको छ । साथै बयानमा नाम पोलिएका अन्यको हकमा पनि प्रहरीले अनुसन्धान गरिरहेको छ ।