काठमाडौं । काठमाडौंमा जारी आईसीसी विश्वकप लिग-२ त्रिकोणात्मक सिरिजमा पपुवा न्यूगिनीले यूएईलाई पराजित गरेको छ ।
आज (शुक्रबार) टियू खेल मैदानमा भएको खेलमा पपुवा न्यूगिनीले यूएईलाई ५६ रनले पराजित गरेको हो । पपुवा न्यूगिनीले दिएको २४७ रनको लक्ष्य पछ्याएको यूएईले ४२ दशमलब २ ओभरमा १९० रन मात्रै बनायो । यूएईका आर्यन लक्राले ५१ रन जोड्दा कप्तान तथा ओपनर मोहमद वासीमले ४१ रन बनाए ।
बलिङमा पिएनजीका रेली हेकुरेले ३ विकेट लिए भने काबुआ मोरिआ र आसद भालाले २/२ विकेट लिए । त्यसअघि यूएईले टस जितेर फिल्डिङ रोजेपछि पहिले ब्याटिङ गरेको पपुवा न्यूगिनीले ५० ओभरमा ९ विकेटको क्षतिमा २४६ रन बनाएको थियो । पपुवा न्यूगिनीका लागि तीन ब्याटरले अर्धशतक प्रहार गरेका थिए ।
ओपनर किप्लिन डोरिगाले ४४ बलमा ५५ रन बनाए । अर्का ओपनिङ ब्याट्सम्यान हिरी हिरी ७७ रनको योगदान दिए । सेसे बाउले नटआउट ८१ रन जोडे। उनले १०६ बलमा १० चौका प्रहार गरे ।
३२ ओभरमा १८४ रन बनाउदा तीन विकेट गुमाएको पिएनजीले बाँकी ओभरमा ६२ रन मात्र जोड्न सक्यो । बलिङमा यूएईका आयन खानले ३ विकेट लिए भने जुनइद सिद्धिकी र जहूर खानले २र२ विकेट लिए । नेपाल, यूएई र पपुवा न्यूगिनीबीच यो सिरिज आइसीसी विश्वकप लिग–२ को अन्तिम सिरिज हो ।
सात टिमबीचको लिग–२ को अन्तिम सिरिजबाट विश्वकप छनोट, एकदिवसीय मान्यता र विश्वकप क्वालिफायर प्लेअफमा पुग्ने टिमको टुंगो लाग्नेछ । चार मध्ये पहिलो खेल जितेसँगै अब एक जिते नेपालको लिग–२ बाटै एकदिवसीय मान्यता जोगिनेछ । बाँकी तीनै खेलमा हात पारे नेपालले लिग–२ को शीर्ष तीनमा स्थान बनाउँदै १० देशबीच प्रतिस्पर्धा हुने विश्वकप छनोटमा प्रतिस्पर्धा गर्न पाउनेछ ।
सिरिजमा नेपालले अब फागुन २८ मा युएई, फागुन २९ मा पिएनजी र चैत २ मा युएईसँग खेल्नेछ ।
प्रतिक्रिया