सुदुरपश्चिम प्रदेशसभा बैठक सुरु, निर्णयक नाउपा अनुपस्थित

कैलाली । सुदूरपश्चिम प्रदेशसभाको बैठक सुरु भएको छ ।

बिहिबार ४ बजेका लागि सारिएको बैठक केही ढिलो गरि सुरु भएको हो । बिहीबारको प्रदेश सभाको बैठकमा मुख्यमन्त्री राजेन्द्र सिंह रावलले विश्वासको मत लिने कार्यक्रम रहेको छ । मुख्यमन्त्री रावलले आजै विश्वासको मत लिनुपर्ने संवैधानिक बाध्यता अनुसार विश्वासको मत लिन लागेका हुन् ।

तर सुदुरपश्चिम प्रदेशमा निर्णयक मानिएको नागरिक उन्मुक्ति पार्टी भने बैठकमा उपस्थित भएको छैन् । सरकार गठनमा सघाएको नाउपाले विश्वासको मत नदिने भएपछि रावल नेतृत्वको सरकार ढल्ने निश्चित भएको छ । रावलले विश्वासको मत नपाएको खण्डमा उनि स्वतः पदमुक्त हुनेछन् ।

त्यसपछि संविधानको धारा ६८ (३) अनुसार प्रदेशसभाको सबभन्दा ठूलो दल नेपाली कांग्रेसको नेतृत्वमा सरकार गठनको बाटो खुल्नेछ । सुदुरपश्चिम प्रदेश सभामा नेपाली कांग्रेसका १९, माओवादीका ११, एमालेका १०, नाउपाका ७, एकीकृत समाजवादीका ५ र राप्रपाका १ जना सांसद छन् ।

विश्वासको मत प्राप्त गर्नका लागि रावललाई २७ सांसदको समर्थन आवश्यक पर्छ ।