एजेन्सी । कोरोनाको संक्रमण केहि कम भएर विश्वले सामान्य रुपमै गति लिन्छ भन्ने अपेक्षा तोड्दै पछिल्ला दिन कोरोना भाईरसको संक्रमण फेरिपनि बढ्दो छ ।
भाईरस फेरि नयाँ अवतारमा फैलदो छ । अमेरिकामा केहि दिन यता एक्स बी बी.१.५ भेरियन्टले तिब्र गतिमा धेरै मानिसलाई संक्रमित बनाईरहेको छ । केहि समय रेस्पिरेटरी साईनसाईटल भाईरस इन्फेक्सनका कारण अस्पतालमा बिरामीको संख्या बढेको थियो । अहिले यो समस्या निर्मुल हुदै गर्दा कोरोना भाईरसको नयाँ स्वरुप पुनः चुनौति बनेको छ ।
अमेरिकामा देखा परेका ४० प्रतिशतभन्दा बढी कोभिड बिरामीमा एक्सबीबी.१.५ फेला परेको पुष्टि भएको जनाइएको छ । फैलाहटको प्रकृती हेर्ने हो भने यो भेरियन्टले ओमिक्रोनका अन्य भेरिअन्टलाई निकै कम समयमा उछिनेको देखिन्छ। छिटो फैलने भएपनि पहिलेका भेरियन्ट जतिकै घातक भने नरहला भन्ने आंकलन स्वास्थ्य अधिकारीहरुको रहेको अन्तराष्ट्रिय समाचार माध्यमहरुले जनाएका छन् ।
यसले ओमिक्रोन भेरिअन्ट ले जस्तो बिरामीलाई अस्पतालमा पुर्याउने वा ज्यान लिने सम्भावना कम रहेपनि खोप नलगाएका, कोभिडको जोखिममा रहेका मानिसहरू र प्रतिरोध प्रणालीमा समस्या रहेका बिरामीहरूभने यसबाट हुने असरको उच्च जोखिममा रहने खतरा पनि औँल्याईएको छ । तिब्र रुपमा फैलिरहेको यो परिवर्तित भाईरस अन्य देशमापनि पुग्ने सम्भावना त छ ।
तर विगतमा सङ्क्रमण फैलिएका र धेरै मानिसले खोप लगाइसकेका देशहरूमा यसले व्यापक प्रभाव पार्ने सम्भावना कम रहेको विज्ञहरुको भनाई छ । खोप नलगाउनेको संख्या बढि रहेका देशहरुले भने यस विषयमा गम्भिर हुन उनिहरुले सुझाएका छन् ।
प्रतिक्रिया