आजबाट श्रीस्वास्थानी व्रत आरम्भ

काठमाडौं । आजबाट (शुक्रबार) श्रीस्वस्थानी व्रतकथा शुरु भएको छ ।

पौष शुक्ल पूर्णिमादेखि शुरु भइ माघ शुक्ल पूर्णिमासम्म एक महिना व्रत बस्ने गरिन्छ । शुक्रबारदेखि माघ स्नान गर्ने र अधिकांश हिन्दुले घरमा सात्विक भावले भक्तिपूर्वक श्रीस्वस्थानी देवीको पूजा आराधना गरी स्वस्थानी कथा सुन्ने र सुनाउने परम्परा रहेको छ । स्वस्थानी व्रतका बेला विभिन्न ठाउँमा मेलासमेत लाग्ने गर्दछ ।

काठमाडौंको शालीनदीमा पनि प्रत्येक वर्ष पूर्णिमादेखि शुरु हुने माधवनारायण मेला पनि आजबाट शुरु भएको छ । स्वस्थानी व्रत कथा सत्ययुगमा हिमालयकी पुत्री पार्वतीले महादेव स्वामी पाउँ भनी बालुवाको शिवलिङ्ग बनाई निराहार तपस्या गरी मनोकांक्षा पूर्ण भएको किंवदन्ती छ ।

शिव—पार्वतीको विवाह भइसकेपछि लोककल्याणका निम्ति परम्परागत रुपमा सोही व्रत कथा प्रचलन हुँदै आएको मानिन्छ ।