यु १९ क्रिकेटः सुदूरपश्चिम फाइनलमा, मधेस प्रदेशको पहिलो जित

काठमाडौं । वागमती प्रदेशमाथि ७ विकेटको जित निकाल्दै सुदूरपश्चिम प्रदेश राजधानीमा जारी वाई वाई यु–१९ पुरुष राष्ट्रिय क्रिकेट प्रतियोगितामा अपराजित रहँदै फाइनलमा प्रवेश गरेको छ ।

मुलपानी क्रिकेट मैदानमा शुक्रवार सम्पन्न खेलमा वागमती प्रदेशले दिएको १ सय २५ रनको लक्ष्य सुदूरपश्चिम प्रदेशले १९.१ ओभरमा ३ विकेट गुमाएर भेट्टायो । समान्य लक्ष्य पछ्याएको सुदूरपश्चिमका लागि कप्तान अनुराग सिंहले अविजित ३९ रनको पारी खेल्दा गजेन्द्र बोहोरा १९ रनमा अविजित रहे । यसअघि ओपनर दीपक बोहोराले १७ रनको व्यक्तिगत स्कोर बनाउँदा अर्का दीपक बोहोराले १० रनको पारी खेले ।

बलिङतर्फ वागमतीका रोशन विकले २ विकेट हात पारे भने प्रतिक श्रेष्ठको नाममा एक विकेट रह्यो । यसअघि टस जितेर पहिला ब्याटिङ गरेको वागमतीले २८.४ ओभरमा सबै विकेट गुमाएर मात्र १ सय २४ रनको योगफल बनाएको थियो । आकाश चन्दले ह्याट्रिक गरेका खेलमा प्रतिक श्रेष्ठले सर्वाधिक ४४ रनको पारी खेल्दा ओपनर सक्षम बस्ताकोटीले ३३ रनको योगदान गरेका थिए । रोशन बिक २६ रनमा नटआउट रहे भने अन्य सात ब्याट्सम्यान शुन्य रनमा पवेलियन फर्किएका थिए ।

वागमतीको इनिङलाई रोक्न आशास चन्दले ह्याट्रिकसहित ४ विकेट निकाल्दा हेमन्त धामीले ३, नरेन साउदले २ तथा युवराज खत्रीले १ विकेट आफ्नो नाममा लेखाए । लिग चरणका सबै खेलमा स्पष्ट जित निकालेर फाइनलमा स्थान बनाएको सुदूरपश्चिम प्रदेश १२ अंकका साथ तालिकाको शीर्ष स्थानमा छ । उता पराजित वागमतीले ६ खेलमा ८ अंक जोडेको छ । वागमती तालिकाको तेस्रो स्थानमा छ ।

एक खेल कम खेलेको लुम्बिनी प्रदेशको समान अंक भएपनि नेट रन रेटको आधारमा देस्रो स्थानमा छ । अब लुम्बिनीले शनिवार हुने खेलमा मधेस प्रदेशलाई पराजित गरे फाइनल प्रवेश गर्नेछ भने झिनो अन्तरले पराजित हुँदा पनि अघिल्लो चरण प्रवेश गर्नेछ । यस्तै कीर्तिपुर मैदानमा सम्पन्न अर्को खेलमा गण्डकी प्रदेशलाई ५ विकेटले हराउँदै मधेस प्रदेशले जारी प्रतियोगितामा पहिलो जित निकालेको छ । मधेसले आफ्नो पाचौं खेलमा सुखद् नतिजा निकालेको हो ।

गण्डकीले दिएको २ सय १४ रनको लक्ष्य मधेसले निर्धारित ५० ओभर सकिन ९ बल बाँकी रहँदा ५ विकेटको क्षतिमा भेट्टायोे । पहिलो जित निकाल्ने क्रममा मधेस प्रदेशका ओपनर मयन यादवले ४९ रनको व्यक्तिगत स्कोर बनाउँदा मेघराज रामले ४३, इमरान शेखले २७, अलि अनसारीले ३२, सर्फराज मनसुरीले २१ रन जोडे । दाब्लु मलिक २१ तथा कप्तान अभिषेक तिवारी १३ रनमा अविजित रहे । मधेसको पाँच विकेट निकाकल्दा पाँच बलरले एक एक विकेट आफ्नो नाममा लेखाए ।

यसअघि टस हारेर पहिला ब्याटिङको निम्तो पाएको गण्डकीले ४८.५ ओभरमा सबै विकेट गुमाएर २ सय १३ रन जोडेको थियो । ओपनर गोविन्द बिकले अर्धशतकीय पारी खेले । ८४ बलको सामना गरेका गोविन्दले ४ चौकाको सहयोगमा ५३ रन बनाउँदा अर्का ओपनर अर्जुन कुमाल ११ रनमा पवेलियन फर्किएका थिए । यस्तै सुजन गौतमले ३० रन जोड्दा, सुदीप अर्यालले २७, करण पंगेनीले २५, सिब्रिन श्रेष्ठले १६ रन बनाउनु बाहेक अन्यले दोहोरो अंकको स्कोर बनाउन सकेनन् ।

गण्डकीको सबै विकेट लिने क्रममा मधेसका अविजित मण्डल, नितिश यादव र अभिषेक तिवारीले समान २÷२ विकेट हात पार्दा सिमन रोयले सर्वाधिक ३ तथा निकेश गुप्ताले १ विकेट निकाले । यससँगै गण्डकीले ६ खेलबाट पाँचौ हार भोगेको छ । दुवै टोली प्रतियोगिताबाट बाहिरिसकेका छन् ।

प्रतियोगितामा शनिवार कीर्तिपुर मैदानमा लुम्बिनी प्रदेश र मधेस प्रदेश तथा मुलपानी मैदानमा कर्णाली प्रदेश र प्रदेश १ बीच प्रतिष्पर्धा हुनेछ ।