नयाँ शीतयुद्ध नगर्ने सी–बाइडेनको वाचा

एजेन्सी । अमेरिकी राष्ट्रपति जो बाइडनले चिनियाँ राष्ट्रपति सी जिन्पिङसँगको मैत्रीपूर्ण भेटपछि चीनसँग कुनै ‘नयाँ शीतयुद्ध’ नगर्ने वाचा गरेका छन्।

सी ले पनि बाइडेन समान धारणा राखे। जी ट्वाइन्टी शिखर सम्मेलनमा सहभागी हुन इन्डोनेशिया पुगेका दुई शीर्ष नेताबिचको छलफलमा उत्तर कोरिया र युक्रेनमाथि रुसी आक्रमणको बारेमा चिन्ताहरू पनि समेटिएको अन्तराष्ट्रिय समाचार माध्यमहरुले जनाएका छन्। सोमबार एक होटलमा भएको तीन घण्टा लामो भेटमा दुई नेताले ताइवानलगायत विभिन्न विषयमा छलफल गरेका थिए ।

बेइजिङद्वारा आफ्नो भू–भाग दाबी गरिएको ताईवानसँगको अमेरिकाको सम्बन्ध अमेरिका चीन सम्बन्धमा विवादको विषय रहँदै आएको छ। गत अगस्टमा अमेरिकी संसदकी सभामुख न्यान्सी पलोसीले ताइवान भ्रमण गरेपछि तनाव थप चुलिएको थियो। उनी त्यहाँ गएपछि चीनले प्रतिक्रिया स्वरूप ताइवान वरिपरि ठूलो मात्रामा सैन्य अभ्यास गरेको थियो जसले अमेरिका र चीनबिच सम्भावित द्वन्द्वको चिन्ता बढाएको थियो।

यीनै तिक्तताका बिच भएको सी र बाईडेनको भेटलाई निकै अर्थपुर्ण रुपमा हेरिएको छ । बाइडनले पदभार ग्रहण गरेपछि दुई महाशक्ति नेताहरूबिच भएको यो पहिलो भेटघाट हो।