एजेन्सी । अमेरिकाको माथिल्लो सदन सिनेटमा राष्ट्रपति जो बाइडेनको डेमोक्र्याटिक पार्टीले बहुमत कायम राख्ने भएको छ।
स्थानीय समयअनुसार शनिबार बेलुका नेभाडा राज्यबाट प्रतिनिधित्व गर्ने सिनेटरको टुंगो लागेको हो। निकै कडा प्रतिस्पर्धामा डेमोक्र्याट सिनेटर क्याथरिन कोर्टेज मास्टोले आफ्नो सिट जोगाउन सफल भएकी हुन्। योसँगै माथिल्लो सदन सिनेटमा डेमोक्र्याटिक पार्टीले ५० सिट जितेको छ भने रिपब्लिकन पार्टी ४९ सिटमा चित्त बुझाउन बाध्य भएको छ । यस्तै, जर्जिया राज्यबाट प्रतिनिधित्व गर्ने सिनेटरको टुंगो आउँदो डिसेम्बरमा हुने रनअफ चुनावबाट लाग्ने छ।
त्यहाँ डेमोक्र्याटिक सिनेटर राफायल वार्नकले रिपब्लिकन उम्मेदवार हर्सल वाकरको सामना गरिरहेका छन् । मध्यावधि चुनावमा दुवै उम्मेदवारले ५० प्रतिशत मत नकटाएपछि रनअफ चुनाव हुने भएको हो। तल्लो सदन हाउस अफ रिप्रिजेन्टेटिभमा भने रिपब्लिकन पार्टीले साँघुरो बहुमत ल्याउने देखिएको छ।
तल्लो सदनको बहुमतका लागि २१८ सांसद चाहिन्छ। अहिलेसम्म रिपब्लिकन पार्टीले २११ तथा डेमोक्र्याटिक पार्टीले २०४ सिट जितेका छन्। बाँकी सिटको नतिजा आउन भने बाँकी छ।
प्रतिक्रिया