काठमाडौं । काठमाडौंमा जारी प्रधानमन्त्री कप क्रिकेटमा मधेस प्रदेशलाई स्तब्ध बनाउँदै विभागीय टोली एपिएफ क्लव प्रतियोगिताको उपाधि नजिक पुगेको छ ।
कीर्तिपुरस्थित त्रिवि मैदानमा बिहीवार सम्पन्न खेलमा एपिएफले मधेस प्रदेशलाई ७ विकेटले हराउँदै फाइनलमा प्रवेश गरेको हो । मधेसले दिएको १ सय २३ रनको लक्ष्य एपिएफले २१ दशमलव ३ ओभरमा मात्र ३ विकेट गुमाएर पूरा गर्यो । एपिएफको जितमा लोकेश बमले अविजित ३५ रनको पारी खेले ।
ओपनर प्रदीप ऐरीले ३३ रन जोड्दा आसिफ सेखले २५ रन बनाउँदै एपिएफलाई सुखद् शुरुवात गराएको थियो । सुमित महर्जनले १३ रन बनाउँदा सन्दीप जोरा ६ रनमा अविजित रहे । मधेसका रुपेश सिंहले २ तथा राजेश यादवले १ विकेट लिए । त्यसअघि टस हारेर पहिले ब्याटिङ गरेको मधेसले ३१ ओभरमा सबै विकेट गुमाएर १ सय २२ रन बनाएको थियो । मधेसका लागि रुपेश सिंहले सर्वाधिक ३५ रन जोडे ।
सन्तोष कार्कीले २० रन जोड्दा इमरान शेखले १६ रन बनाए । अनिल साहले १३, आदील आलमले ११ र राजेश यादवले १० रन बनाए । मधेसको इनिङलाई सस्तैमा रोक्ने क्रममा एपिएफका कमल ऐरीले ४ विकेट लिए । भुवन कार्की र मौषम ढकालले समान दुई दुई विकेट लिए । फाइनल प्रवेश गरेको एपिएफले अब उपाधिका लागि नेपाल पुलिस क्लव र त्रिभुवन आर्मी क्लवबीचको विजेतासँग खेल्नेछ ।
पुलिस र आर्मीबीचको दोस्रो सेमिफाइनल शुक्रवार हुनेछ । र फाइनल खेल शनिवार हुने तालिका रहेको छ ।
प्रतिक्रिया