काठमाडौं । मन्त्रिपरिषद्का पूर्वअध्यक्ष खिलराज रेग्मीले आगामी मंसिर ४ गते हुने निर्वाचनमा उपयुक्त उम्मेदवार छनोट गर्न मतदाताहरुलाई आह्वान गरेका छन् ।
बुधवार नेपाल–चाइना फ्रेन्डसिप फोरमले आयोजना गरेको एक कार्यक्रममा बोल्दै रेग्मीले विगतको मूल्यांकन र विश्लेषण गरेर वर्तमानको आवश्यकतालाई ठिक ढंगले अगाडी बढाउनसक्ने उम्मेदवारलाई मतदान गर्न आह्वान गरेका छन् । उनले मतदाताहरुलाई दूरदृष्टि राखेर सुखद् भविष्यको सपना साकार पार्ने उपयुक्त उम्मेदवार छनोट गर्न आग्रह गरे । उनले निर्वाचनपछि पछुताउनुभन्दा निर्वाचनपूर्व नै विचार पुर्याउनुपर्ने बताए ।
पूर्वअध्यक्ष रेग्मीले स्वच्छ, निष्पक्ष र भयरहीत वातावरणमा निर्वाचन सम्पन्न हुनुपर्ने बताए । विकासका विभिन्न काममा हात लाग्दा काम सम्पन्न हुन नसकेको र लगानी खेर गइरहेको उनले बताए । उनले कृषि क्षेत्रको विकासका लागि किसानलाई तालिम दिनुपर्ने बताए ।
उनले व्यक्तिलाई स्वरोजगार बनाउन प्राविधिक तथा सीपमुलक तालिम दिनुपर्नेमा जोड दिए । नेपाल एक चीन नीतिप्रति प्रतिवद्ध रहेको उल्लेख गर्दै आपसमा आशंका हुनु नहुने बताए । आपसमा शंका आउन नदिन राज्य पक्षले प्रयत्न गरिरहेको र समाजले पनि सो कुरालाई अंगिकार गरेको उनले बताए ।
प्रतिक्रिया