बैतडी। नेपाली कांग्रेस बैतडीका पुराना नेता महेशशरण भट्टको सोमबार निधन भएको छ ।
बैतडीको दोगडाकेदार गाउँपालिका–४ पिपलकोट निवासी भट्टको ७५ वर्षको उमेरमा आफ्नै निवासमा निधन भएको हो । पारिवारिक स्रोतका अनुसार भट्ट श्वासप्रश्वासका बिरामी थिए। भट्ट केही वर्षयता सक्रिय राजनीतिबाट टाढा भए पनि सामाजिक क्षेत्रमा निकै परिचित नाम हो ।
नेपाली कांग्रेस बैतडीको सचिवसमेत रहेकाका भट्टले विभिन्न सङ्घसंस्थाको नेतृत्वसमेत गरेका थिए । भट्ट नेपाल परिवार नियोजन सङ्घ बैतडीको सभापतिसमेत रहेका थिए । श्रीकेदार मावि पिपलकोटको संस्थापक प्रधानाध्यापकका रूपमा काम गरेका भट्टले समाज परिवर्तनका लागि थुप्रै काम गरेका थिए ।
भट्टको निधनसँगै बैतडी कांग्रेसले एक कुशल अभिभावक गुमाएको कांग्रेस बैतडीका सभापति चतुरबहादुर चन्दले बताए।भट्टको निधनमा कांग्रेसका नेता, कार्यकर्ताका साथै अन्य व्यक्तिले समेत शोक व्यक्त गरेका छन् ।
प्रतिक्रिया