डाँका गर्ने दुई जना प्रहरीको फन्दामा

भक्तपुर । नेकपा (एकीकृत समाजवादी)का भक्तपुर जिल्ला अध्यक्ष श्याम बस्नेतको घरमा डाँका गर्ने समुहका दुई जनालाई प्रहरीले पक्राउ गरेको छ ।

गठ्ठाघरस्थित बस्नेतको घरमा ढोका फोडी अपहरणको धम्की दिइ डाँका गर्नेहरुलाई आईतबार काठमाडौं उपत्यका अपराध अनुसन्धान कार्यालयले पक्राउ गरेको हो । पक्राउ पर्नेहरुमा उदयपुर घर भई हाल चाँगुनारायण बस्ने ४१ वर्षीय अम्बरबहादुर लामा र संखुवासभा घर भई हाल काठमाडौं जोरपाटी बस्ने ३२ वर्षीय सुवास भनिने रविनकिशोर राई छन ।

उनीहरूको समूहले गत भदौ २५ गते राति ३ बजे बस्नेतको घर कम्पाउण्डको ढोका, घरको मूलढोका र बस्नेत सुत्ने कोठाको ढोकासमेत फोडेर घरका सदस्यलाई पेस्तोल ताकेर डाँका गरेका थिए । उनीहरूको साथबाट स्पेशल मेड इन इटाली लेखिएको पेस्तोल एक थान, सो पेस्तोलको म्याग्जिन एक थान, गोली दुई राउण्ड, खुकुरी एक थान, फलामको रड एक थान लगायत विभिन्न घरेलु औजार बरामद गरेको प्रहरीले जनाएको छ ।

पक्राउ परेका दुवै जनालाई चोरी तथा डाँकासम्बन्धी कसुर र हातहतियार तथा खरखजानासम्बन्धी कसुरमा थप अनुसन्धान तथा कारबाहीका लागि सोमबार जिल्ला प्रहरी परिसर भक्तपुरमा बुझाएको प्रहरीले जानकारी दिएको छ ।