काठमाडौं । श्रम, रोजगार तथा सामाजिक सुरक्षामन्त्री शेरबहादुर कुँवरले जनताको पक्षका कानूनहरु ठूला नेताहरुको दबाबका कारण तुहिने गरेको आरोप लगाएका छन् ।
सोमबार ७७ औं विश्व श्रमीक दिवसको अवसरमा काठमाडौंमा आयोजित कार्यक्रमलाई सम्बोधन गर्दै मन्त्री कुँवरले यस्तो आरोप लगाएका हुन । उनले भ्रष्टाचार, नागरिकता र श्रम आयोग लगायतका ऐन, नियम बनाउने ठूला नेताहरुले दबाब दिने गरेको बताए ।
अहिलेको सरकारले पनि श्रम आयोग गठन सम्बन्धी प्रक्रिया तीन पटक मन्त्रीपरिषद्मा पु¥याउँदासमेत एजेण्डा नबनेको गुनासो मन्त्री कुँवरको छ । मन्त्री कुँवरले श्रम आयोग गठन गर्नेकुरा तीन पटक मन्त्रीपरिषद्मा पठाए पनि एजेण्डा नबनाइ अहिले सामाजिक समितिमा पठाएर सरकारले अल्झाउने काम गरेको भन्दै आक्रोश पोखेका छन् ।
मन्त्रालयले असंगठित, अनौपचारिक क्षेत्र र वैदेशिक रोजगारीमा गएका श्रमिकलाई सामाजिक सुरक्षा कोषमा आवद्धता गर्ने तयारी मन्त्रालयले गरिरहेको उनको भनाई छ । उनले सामाजिक सुरक्षा कोषको दायराभित्र वैदेशिक रोजगारका श्रमीकहरुलाई पनि ल्याउन सके सामाजिक सुरक्षा कोषले गति लिने विश्वास समेत व्यक्ति गरेका छन् ।
मन्त्री कुँवरले श्रमीकहरु एकजुट हुनसके समाजमा श्रमीकमाथि हुने विभेदको अन्त्य गर्न सकिने पनि बताए ।
प्रतिक्रिया