मृत्यु हुनेको संख्या १५३ पुग्यो, ८२ जना घाईते

एजेन्सी । दक्षिण कोरियाको एक हलोइन समारोहमा भागदौड मच्चिदा मृत्यु हुनेको संख्य १५३ पुगेको छ ।

राजधानी सिओलको इतेओन इलाकामा भएको उक्त घटनामा ८२ जना घाइते भएको अन्तराष्ट्रिय संचार माध्यमहरुले जनाएका छन् । सिओलको लोकप्रिय रात्रिकालीन क्षेत्र इतेओलमा हलोइन मनाउनका लागि जम्मा भएको भीडमा भागदौड मच्चिएको बताइएको छ । कार्यक्रममा विदेशी पर्यटकहरुको पनि उल्लेख्य उपस्थिति रहेको बताइएको छ । दक्षिण कोरियाको अग्नि सेवाका अनुसार घटनामा ज्यान गुमाउनेहरुमा अधिकांश व्यक्तिहरु किशोर किशोरी रहेका छन् ।

२० वर्ष आसपासका व्यक्ति धेरैले घटनामा ज्यान गुमाएका र घाइते भएका समाचारमा जनाइएको छ । साँघुरो क्षेत्रमा अत्यधिक भीड जम्मा भएका कारण यो दुखद घटना भएको हुनसक्ने प्रहरीले अनुमान गरेको छ । कोभिड प्रकोपपछि दक्षिण कोरियामा पहिलोपटक ठूलो भीडका साथ हलोइन मनाइएको हो । घटनालगत्तै दक्षिण कोरियाली राष्ट्रपति युन सुक योलले विस्तृत अनुसन्धानका लागि निर्देशन दिएका छन् ।

सरकारी अधिकारीहरुका अनुसार १९ जना विदेशीको ज्यान गएको पुष्टि भएको छ ।