धादिङमा बसको ठक्करबाट एकको मृत्यु, बसमा आगजनी

धादिङ । पृथ्वी राजमार्गअन्तर्गत धादिङको गल्छीमा बसले मोटरसाइकललाई ठक्कर दिँदा मोटरसाइकल चालकको मृत्यु भएको छ ।

काठमाडौंबाट सिराहाका लागि छुटेको बागमती प्रदेश ३ ००१ ख ०७२२ नम्बरको यात्रुबाहक बसले गल्छी गाँउपालिकाको खेस्टेखोला पुलनजिकै विपरीत दिशाबाट आउँदै गरेको बा. ९२ प २३६९ नम्बरको मोटरसाइकललाई ठक्कर दिँदा मोटरसाइल चालकको मृत्यु भएको हो ।

मृत्यु हुनेमा थाँक्रे गाउँपालिका वडा नं. ११ का २६ वर्षीय सुनिल थापा रहेका छन् । उनको उपचारा क्रममा मृत्यु भएको प्रहरीले जनाएको छ । दुर्घटनामा परी मोटरसाइकलमा सवार अर्का ३४ वर्षीय रमेश लामा घाइते भएका जिल्ला प्रहरी कार्यालय धादिङले जनाएको छ ।

दुर्घटनापछि आक्रोशित स्थानीयबासिन्दाले बसमा आगजनी गर्दा बस पूर्ण रुपमा क्षतिग्रस्त भएको प्रहरीले जानकारी दिएको छ ।