म्यानमार सेनाले गर्‍यो हवाई हमला

एजेन्सी । म्यानमार सेनाले लामो समयदेखि सशस्त्र विद्रोह गर्दै आएको काचिन सशस्त्र समूहमाथिको कारवाहीलाई तीब्रता दिएको छ ।

अन्तर्राष्ट्रिय समाचार संस्थाहरुका अनुसार म्यानमार सेनाले पछिल्लो पटक गरेको हवाइ कारवाहीमा कम्तीमा ८० जना मारिएको दाबी गरिएको छ । यद्यपी मारिनेको संख्या योभन्दा निकै बढी रहेको हुन सक्ने आंकलन गरिएको छ । हवाइ आक्रमणमा सर्वसाधारणको पनि हताहती भएको बताइएको छ । आइतवार राति उत्तरी काचिन राज्यमा भएको उक्त घटनामा परि झन्डै एक सय जना घाईते भएका छन् ।

काचिन स्वतन्त्रता संगठनको स्थापनाको उत्सव मनाउन कलाकारसहित झण्डै पाँच सय मानिस भेला भएको स्थानमा हवाई आक्रमण भएको थियो । काचिन कलाकार संघका प्रवक्ताले सैन्य विमानले आइतबार साँझ उत्सवमा चारवटा बम खसालेको पुष्टि गरेका छन् । विष्फोटलाई म्यानमारको सेनाले फेब्रुअरीमा सत्ता कब्जा गरेपछिको सबैभन्दा खराब हवाई आक्रमण भनिएको छ ।

मानवअधिकार समूहहरूले सेनाले युद्ध कानूनको उल्लघंन गरेको आरोप लगाउँदै अन्तर्राष्ट्रिय समुदायलाई हतियार र हवाई इन्धनको बिक्रीमा प्रतिबन्ध लगाउन आग्रह गरेको छ । म्यानमारको सेनाले भने काचिन सशस्त्र समूहलाई लक्षित गरी हवाई हमला गरेको र सर्वसाधारणको मृत्यु भएको खबरलाई अफवाह भन्दै खारेज गरेको जनाएको छ ।