नयाँ वर्षको सुरुवात सडकमै: शिक्षक तथा विद्यालय कर्मचारीको आन्दोलन जारी

काठमाडौँ । नयाँ वर्षको उल्लासपूर्ण दिनमा जहाँ धेरैजसो नेपालीले उत्सव र उमङ्गका साथ नयाँ वर्षलाई स्वागत गरिरहेका छन्, त्यहाँ अर्कोतर्फ आन्दोलनरत शिक्षक तथा विद्यालय कर्मचारीहरूले भने यो दिन पनि सडक संघर्षमै बिताइरहेका छन्।

विद्यालय शिक्षा ऐन यथाशीघ्र जारी गरिनुपर्ने मुख्य मागसहित चैत २० गतेदेखि निरन्तर आन्दोलनरत रहेका उनीहरूले नयाँ वर्षको सुरुवात पनि माइतीघर मण्डला–बानेश्वर सडक खण्डमा प्रदर्शन गर्दै मनाउने घोषणा गरेका छन्।

नेपाल शिक्षक महासंघका अध्यक्ष लक्ष्मीकिशोर सुवेदीले नयाँ वर्षको आरम्भ विद्यार्थी, शिक्षक, कर्मचारी र सम्पूर्ण विद्यालय शिक्षा प्रणालीको उन्नयनका पक्षमा संघर्षमा खर्चिन लागिएको बताए। उनले माग पूरा नहुञ्जेलसम्म आन्दोलन जारी रहने स्पष्ट पार्दै, “जति ढिला हुँदै जान्छ, उति नै ऊर्जा र प्रतिबद्धता बढ्दै जान्छ,” उनले भने।

उनले राज्यलाई शिक्षक समुदायका न्यायिक मागहरू स्वीकार गर्नुको विकल्प नरहेको पनि चेतावनी दिए। आन्दोलनमा अझ व्यापक सहभागिता सुनिश्चित गर्न देशभरका शिक्षक तथा विद्यालय कर्मचारीहरूलाई एकजुट हुन आह्वान गर्दै, सुवेदीले विगतमा सरकारसँग भएका सहमति कार्यान्वयन नगरेको प्रति असन्तोष जनाए।

उनीहरूले शान्तिपूर्ण तर दृढ रूपमा आफ्नो हक र अधिकारका लागि आन्दोलन जारी राख्ने प्रतिबद्धता जनाएका छन्। नयाँ वर्षको दिनले आन्दोलनलाई अझ नयाँ जोश र संकल्पको रूप दिएको आन्दोलनरत शिक्षकहरूको भनाइ छ।