सीपीसीको नेतृत्वमा पुन: सी जिनपिङ चयन

एजेन्सी । चिनियाँ कम्युनिस्ट पार्टी (सीपीसी) को २०औं महाधिवेशनले सी जिनपिङलाई तेस्रो कार्यकालका लागि पनि चयन गरेको छ ।

शनिबार सम्पन्न महाधिवेशनले सर्वोच्च नेता सी लाई महासचिवमा चयन गरेको हो । गएको १६ अक्टोबरदेखि राजधानी बेइजिङमा सुरु भएको महाधिवेशनले ‘सी विचारधारा’ लाई थप मजबुत बनाउने निर्णय गरेको छ । सी विचारधारालाई सीपीसीले सन् २०१७ मा सम्पन्न १९औं राष्ट्रिय महाधिवेशनबाट स्वीकृत गरिसकेको थियो ।

यसमा सीले चिनियाँ विशेषता अनुसारको नयाँ चिनियाँ समाजवादी समाज निर्माण गर्ने अवधारणा राखेका छन् । त्यस्तै महाधिवेशनले २०५ सदस्यीय केन्द्रीय कमिटी पनि चयन गरेको छ । महाधिवेशनबाट उच्च तहका चारजना नेताले अवकाश लिएको चिनियाँ सरकारी सञ्चार माध्यम सिन्ह्वाले जनाएको छ ।

अवकाश पाउने नेताहरूमा यसअघि पोलिटब्यूरो स्थायी समितिमा रहेका ली खछ्याङ, ली चान्सु, वाङ याङ र हान झेन रहेका छन् । आगामी आईतबार बस्ने नवनिर्वाचित केन्द्रीय कमिटीको बैठकबाट पोलिटब्यूरो र पोलिटब्यूरो स्थायी समिति चयन गरिने छ ।