नयाँ दिल्ली । भारतको राजधानी नयाँ दिल्लीमा गर्मीले सबै पुराना कीर्तिमानहरू तोड्ने संकेत देखिएपछि भारतीय मौसम विज्ञान विभागले आगामी तीन दिनका लागि ‘रेड अलर्ट’ जारी गरेको छ।
यसअघि जारी गरिएको ‘अरेन्ज अलर्ट’लाई स्तरोन्नति गर्दै अवस्था थप गम्भीर बन्दै गएको जनाइएको छ। विभागका अनुसार राजधानी क्षेत्रमा अत्यधिक तापक्रमका कारण लु लाग्ने (हिट स्ट्रोक) जोखिम अत्यन्तै बढेको छ भने गर्मीजन्य अन्य स्वास्थ्य समस्याहरू पनि चुलिएका छन्।
दिल्लीमा मेदेखि जुलाईसम्म गर्मीको लहर सामान्य मानिए पनि पछिल्ला वर्षहरूमा यसको तीव्रता र अवधि दुवै बढ्दै गएको मौसम विज्ञहरूको विश्लेषण छ। सरकारले सर्वसाधारणलाई दिउँसोको समयमा घरबाहिर ननिस्कन, प्रशस्त पानी र झोलिलो पदार्थ सेवन गर्न तथा गाह्रो शारीरिक श्रमबाट टाढा रहन कडा रूपमा आग्रह गरेको छ।
साथै विद्यालयहरू, कार्यालयहरू र स्वास्थ्य संस्था सबैलाई उच्च सतर्कतासहित सम्भावित आपतकालीन अवस्थाको तयारीमा रहन निर्देशन दिइएको छ। उक्त अत्यधिक गर्मीको असर राजधानीको दैनन्दिन जनजीवनमा समेत देखिन थालेको छ। सडकहरू सुनसान भइरहेका छन् भने विभिन्न सार्वजनिक सेवा केन्द्रहरूमा आपतकालीन उपाय अपनाउन थालिएको छ।
मौसम विभागले स्थिति अझ बिग्रन सक्ने भएकाले थप सजग रहन आह्वान गरेको छ।
प्रतिक्रिया