भारत–पाकिस्तान तनावः २४ विमानस्थल बन्द, सीमा क्षेत्रमा सुरक्षा सतर्कता उच्च

काठमाडौं । भारतले हालै सञ्चालनमा ल्याएको ‘अपरेशन सिन्दूर’ पश्चात् भारत–पाकिस्तानबीचको तनाव झनै चर्किएको छ।

पछिल्ला ३६ घण्टामा सीमावर्ती क्षेत्रमा परिस्थितिहरू तीव्र रूपमा परिवर्तन भएका छन्। स्थिति जटिल बन्दै गएपछि भारत सरकारले सुरक्षालाई सर्वोच्च प्राथमिकता दिँदै पञ्जाब, जम्मू–कश्मीर, लद्दाख, गुजरात, राजस्थान र हिमाचल प्रदेशमा पर्ने २४ वटा विमानस्थल अस्थायी रूपमा बन्द गरेको छ।

यी क्षेत्रहरू पाकिस्तानसँगको सीमा नजिक वा रणनीतिक रूपमा संवेदनशील मानिन्छन्। भारतीय अधिकारीहरूका अनुसार पाकिस्तानले पठानकोट, जालन्धर र जैसलमेर जस्ता स्थानहरूमा ड्रोन आक्रमण प्रयास गरेको हुँदा यस्तो कदम चालिएको हो। सम्भावित हवाई तथा ड्रोन आक्रमणबाट नागरिक सुरक्षालाई ध्यानमा राख्दै विमानस्थल बन्द गरिएको जनाइएको छ। नागरिक उड्डयन सुरक्षा ब्यूरोले पनि सबै विमानस्थल र एअरलाइनहरूलाई उच्च सुरक्षा सतर्कता अपनाउन निर्देशन जारी गरेको छ।

एयरलाइन्सहरूले आफ्ना यात्रुहरूलाई ट्राभल एडभाइजरी जारी गर्दै यात्रा स्थगन वा विकल्प खोज्न सुझाव दिएका छन्। यता, पाकिस्तानले बिहीबार राति भारतमा ड्रोन आक्रमण गर्न खोजेको दाबी भारतीय सेनाले सार्वजनिक गरेको छ। जवाफस्वरूप भारतले जम्मूदेखि राजस्थानसम्म ब्ल्याकआउट गरेको थियो। यही कारणले धर्मशालामा जारी आईपीएल खेल—पञ्जाब किंग्स र दिल्ली क्यापिटल्सबीचको प्रतिस्पर्धा पनि बीचैमा रोकिएको र अन्ततः रद्द गरिएको थियो।

सुरक्षाको थप विवरण दिँदै भारतीय वायु रक्षा बलले पठानकोट क्षेत्रमा पाकिस्तानी वायुसेनाको एक लडाकु विमान र नौशेरा क्षेत्रमा दुई ड्रोन खसालेको दाबी पनि गरेको छ।