काठमाडौं । भारत र पाकिस्तानबीचको तनाव फेरि चुलिएको छ।
अन्तर्राष्ट्रिय सिमानासहित नियन्त्रण रेखामा पनि दुवै देशबीच रातभर गोलीबारी भएको भारतीय तथा पाकिस्तानी सञ्चार माध्यमहरूले जनाएका छन्। भारतीय पक्षका अनुसार पाकिस्तानले भारतका १५ भन्दा बढी स्थानमा हवाई आक्रमण गरेको छ। उक्त आक्रमणमा जम्मु–कश्मीरको उरी क्षेत्रमा एक भारतीय महिलाको ज्यान गएको भारतीय सञ्चार माध्यमहरूले दाबी गरेका छन्।
भारतले तीन पाकिस्तानी लडाकु विमान-दुई जेएफ–१७, एक एफ–१६—र एउटा जासुसी विमान खसालेको दाबी गरेको छ। यता, पाकिस्तानले भने भारतमा कुनै पनि प्रकारको हवाई आक्रमण नगरेको बताएको छ, यद्यपि भारतका विभिन्न स्थानमा विस्फोटका घटनाहरू भएको पुष्टि गरिएको छ।
यसअघि भारतले मंगलबार राति पाकिस्तानका ९ स्थानमा आक्रमण गरेको थियो, जसमा पाकिस्तानको दाबीअनुसार ३१ जनाको मृत्यु भएको थियो। सीमामा बढ्दो सैन्य तनावको प्रभाव खेलकुदमा पनि परेको छ। धर्मशालामा भइरहेको इन्डियन प्रिमियर लिग ९आईपीएल० अन्तर्गत पञ्जाब किंग्स र दिल्ली क्यापिटल्सबीचको खेल ११ ओभरसम्म पुग्दा पाकिस्तानतर्फबाट भारतमा आक्रमण भएको खबर फैलिएपछि खेल स्थगित गरियो।
क्षेत्रीय सुरक्षाको कारण धर्मशालामा ब्ल्याकआउटसमेत गरिएको थियो। त्यस्तै, पाकिस्तान सुपर लिग (पीएसएल) का बाँकी खेलहरू सुरक्षा चुनौतीका कारण पाकिस्तानबाट युएई सरेका छन्। स्थिति तनावपूर्ण बनेपछि अमेरिकाले दुवै मुलुकलाई संयमित हुन र आक्रमण रोक्न अपिल गरेको छ।
अमेरिकी विदेश मन्त्रालयकी प्रवक्ता ट्यामी ब्रूसले पत्रकार सम्मेलनमार्फत युद्ध समाधान होइन भन्ने कुरा मध्य–पूर्वको अनुभवले प्रमाणित गरिसकेको उल्लेख गर्दै भारत–पाकिस्तान दुवैलाई सैन्य गतिविधि बन्द गर्न आग्रह गरेकी हुन्।
प्रतिक्रिया