काठमाडौं । रूपन्देहीको लुम्बिनी सांस्कृतिक नगरपालिका–२ अर्दौलीस्थित दानव नदीमा हराएका थप दुई बालकको शव फेला परेको छ।
मंगलबार बिहान सशस्त्र प्रहरीको गोताखोर टोलीले १३ वर्षीय उमेश यादव र १२ वर्षीय मन्नु हरिजनको शव फेला पारेको हो। यसअघि १४ वर्षीय राज यादवको शव सोमबार साँझ नै फेला परेको थियो। तीनै जना बालक सोमबार दिउँसो दानव नदीमा पौडी खेल्ने क्रममा बेपत्ता भएका थिए।
उनीहरूको खोजीमा सशस्त्र प्रहरी बल नेपाल नम्बर ४२ रिजर्भ गण बाँकेबाट दीपक कोइरालाको कमाण्डमा गोताखोर टोली परिचालित गरिएको थियो। सशस्त्र प्रहरीका सहप्रवक्ता शैलेन्द्र थापाका अनुसार उद्धार प्रयास सकिएपछि घटनास्थलमा थप सुरक्षात्मक उपायबारे छलफल सुरु गरिएको छ।
प्रतिक्रिया