१९ दिनदेखि माइतीघरमा शिक्षकको आन्दोलनः किन अझै पछि हटेका छैनन् ?

काठमाडौं । विद्यालय शिक्षा ऐन जारी गर्न माग गर्दै शिक्षकमात्र होइन, शिक्षा प्रणाली नै आन्दोलित देखिन थालेको छ।

माइतीघर मण्डलामा शिक्षकहरूको आन्दोलन आज आइतबार १९औं दिनमा प्रवेश गरेको छ। गत चैत २० गतेदेखि सुरु भएको यो आन्दोलनमा शिक्षामन्त्री विद्या भट्टराई, सभामुख देवराज घिमिरे र प्रधानमन्त्री केपी शर्मा ओलीसँग समेत छलफल भइसकेको छ। तर, शिक्षकहरूले ऐन पारित नहुँदासम्म आन्दोलन नरोकिने स्पष्ट सन्देश दिएका छन्।

आन्दोलनको बीचमै एसएसइ परीक्षाको उत्तरपुस्तिका मूल्याङ्कन कार्य प्रभावित भएको छ भने वैशाख ११ गतेदेखि सुरु हुने कक्षा १२ को परीक्षामा समेत आन्दोलनको प्रभाव देखिन सक्ने सम्भावना बढेको छ। शिक्षकहरूको भनाइ अनुसार, विद्यालय शिक्षा ऐन जारी नगरी सरकार वार्तामा गम्भीर नभएको महसुस उनीहरूलाई भएको छ।

त्यसैले आन्दोलन फिर्ता लिने कुनै संकेत उनीहरूबाट देखिएको छैन।