नवलपरासी । नारायणी नदीमा डुबेर गैँडाकोट–१ का दुई बालबालिका दिदीभाइ बेपत्ता भएका छन्।
गैँडाकोटस्थित ब्रिटिस क्याम्प नजिकै सोमबार बेलुका सो हृदयविदारक घटना भएको हो। १३ वर्षीया दीक्षा सेर्पुञ्जा र उनका ९ वर्षीय भाइ स्वप्निल सेर्पुञ्जा घर नजिकैको नारायणी नदीमा हजुरआमा सुनमाया कुमालसँग गएका थिए। फर्कने क्रममा हजुरआमाको चप्पल नदीमा बग्दा बालक स्वप्निल चप्पल लिन नदीमा पसेका थिए।
उनलाई बचाउने प्रयासमा दीक्षा पनि नदीमा हाम फालेकी थिइन्। दुबै जना त्यसपछि बेपत्ता भएका हुन्। इलाका प्रहरी कार्यालय गैँडाकोटका निमित्त प्रमुख, प्रहरी नायब निरीक्षक सानुकाजी विष्टका अनुसार घटनाको जानकारी पाएपछि प्रहरी टोली घटनास्थल पुगेको थियो।
यद्यपि, प्रहरीसँग आफ्नै गोताखोर टोली नभएकाले मंगलबार बिहानदेखि खोजी कार्यलाई तीव्रता दिइएको छ। स्थानीय प्रशासन र सुरक्षाकर्मीको सहयोगमा बेपत्ता बालबालिकाको खोजी जारी रहेको छ।
प्रतिक्रिया