विराटनगर । कोशी प्रदेश प्रमुख पर्शुराम खापुङले नयाँ सरकार गठनका आह्वान गरेका छन् ।
शनिबार मुख्यमन्त्री हिक्मत कार्कीले राजीनामा दिएसँगै प्रदेश प्रमुख खापुङले आजै पाँच दिनको समय दिएर सरकार गठनको आव्हान गरेका हुन् । संविधानको धारा १६८ को उपधारा (५) अनुसार नयाँ सरकार गठनको लागि आव्हान गर्दै प्रदेश प्रमुख खापुङले उक्त समय दिएका हुन् । शनिबार प्रदेशसभा बैठकमा मुख्यमन्त्री कार्कीले पदबाट राजीनामा दिएका थिए ।
विश्वासको मत लिने प्रयोजनका लागि आव्हान भएको बैठकमा विश्वासको मतका लागि बहुमत जुटाउन नसकेपछि कार्कीले राजीनामा दिएका हुन् । उनी गत भदौ २२ गते नेपालको संविधानको धारा १६८ को उपधारा (३) अनुसार सर्वोच्चको परमादेशबाट मुख्यमन्त्री बनेका थिए । प्रदेश प्रमुखले दिएको समयसीमाभित्र उपधारा (५) अनुसार सरकार गठन गर्न नसके प्रदेशसभा विघटन हुनेछ ।
९३ सदस्यीय प्रदेशसभामा बहुमत सदस्य (४७) सांसदको समर्थन लिएर जाने कुनै पनि सांसद मुख्यमन्त्री हुने संविधानमा व्यवस्था छ । कांग्रेस, माओवादी केन्द्र, नेकपा एकीकृत समाजवादी र जसपा आबद्ध गठबन्धन दलले राप्रपासमेतसँग सहमति गरेर नयाँ सरकार निर्माणको कसरत थालेका छन् ।
प्रतिक्रिया