आइतबार हुने उपनिर्वाचनमा पृथ्वी राजमार्ग बन्द रहने

तनहुँ । आइतबार हुने उपनिर्वाचनका दिन पृथ्वी राजमार्ग बन्द हुने भएको छ ।

जिल्ला प्रशासन कार्यालय तनहुँले सूचना जारी गरेर मतदानका दिन तनहुँ १ निर्वाचन क्षेत्रमा पर्ने राजमार्ग बिहान ५ बजेदेखि ६ बजेसम्म राजमार्ग खण्ड र भित्रि सडकखण्डमा सवारी साधन पूर्णरुपमा बन्द रहने भएको छ । पृथ्वी राजमार्गको मुग्लिङ पुलदेखि व्यास नगरपालिकाको मादी नदीको पुलको पश्चिम भाग सम्म, डुम्रे–बेंसीसहर सडकखण्ड, आँबुखैरेनी गोरखा सडकखण्ड, दमौली दुईपिप्ले सडकखण्डलगायत सम्पूर्ण स्थानीय सडक बन्द रहने छन् ।

यद्यपी दमकल, एम्बुलेन्स, खानेपानीका ट्याङ्कर, दुध बोक्ने सवारी साधन, शववाहन, फोहोरमैला व्यवस्थापनका लागि प्रयोगमा आउने सवारी साधन, अस्पतालमा कार्यरत चिकित्सक, स्वास्थ्यकर्मी, अस्पतालको परिचय पत्रसहित चलेको सवारी साधन र सूचना तथा प्रसारण विभागबाट जारी प्रेस पास भएको पत्रकार चढेको सवारी साधन बाहेक सबै प्रकारका सवारी साधनहरु पूर्ण रूपमा बन्द रहने छ ।