राष्ट्रपतिमा सहमति खोज्न दलहरु आजपनि दौडधुपमा

काठमाडौं । राष्ट्रपति निर्वाचनका लागि सहमति खोज्न दलहरु आजपनि निर्णयक वार्तामा जुटेका छन् ।

सरकारको नेतृत्व गरिरहेको नेकपा माओवादी केन्द्रका अध्यक्ष एवम् प्रधानमन्त्री पुष्पकमल दाहाल प्रचण्डले आज नेकपा एमालेका अध्यक्ष केपी ओलीसंग पनि निर्णयक वार्ता गर्ने तयारी गरेका छन् । वार्ता दिउँसो हुने भनिएको छ । यद्यपी समय र स्थापन भने निर्धारण गरिएको छैन् । त्यसघि प्रधानमन्त्री दाहालले नेपाली कांग्रेस संग पनि वार्ताको तयारी गरेका छन् ।

कांग्रेस, माओवादी, एकीकृत समाजवादी र जसपाको संयुक्त बैठक बस्ने तयारी भइरहेको प्रधानमन्त्रीको सचिवालयले जनाएको छ । बिहिबार माओवादी, एकीकृत समाजवादी र जसपाको संयुक्त बैठक बसेको थियो । सोही बैठकले आज कांग्रेससँग पनि वार्ता गर्ने सहमति गरेको हो ।

आजको बैठकले कांग्रेस नेतृत्वको पाँचदलीय गठबन्धन ब्यूँताउने तयारीलाई औपचारिकता दिने नेताहरु बताउँछन् । कांग्रेससहितको बैठक राष्ट्रपतिको साझा उम्मेदवार चयन गर्ने र पुरानो सत्ता गठबन्धन व्युँताउने विषयमा केन्द्रित हुने देखिएको छ ।

२५ गते हुने राष्ट्रपति पदको निर्वाचनका लागि १३ गते मनोनयन दर्ताको कार्यक्रम रहेकाले दलहरु आजै साझा उम्मेदवार टुंगो लगाउने प्रयासमा छन् ।