सडकबाट जनयुद्ध गरेर नयाँ परिवर्तन स्थापित गर्छौँः धर्मेन्द्र बास्तोला

काठमाडौं । नेकपा बहुमतका संयोजक धर्मेन्द्र बास्तोलाले नयाँ प्रकारको जनयुद्धको तयारी गरिरहेको बताएका छन् ।

जनयुद्ध दिवसका अवसरमा सोमबार काठमाडौंमा आयोजित एक कार्यक्रममा बास्तोलाले यसअघि जंगलमा गएर जनयुद्ध गरेको र अब सडकबाट खुल्ला रूपमा जनयुद्ध गरेर नयाँ परिवर्तन स्थापित गर्ने बताए । नयाँ प्रकारको जनयुद्धबाटै नयाँ समाज स्थापित गर्ने उनको भनाई छ । उनले मुलुकलाई परिवर्तन गर्नका लागि क्रान्तिकारीबीच एकताको अभियान चलेको बताएका छन् ।

बास्तोलाले अब नेपालको कम्युनिस्ट आन्दोलनमा टुटफुटको श्रृखलालाई अन्त्य गर्दै कम्युनिस्ट ध्रुवीकरणको वातावरण बन्दै गएको बताए । अहिले प्रचण्ड, बाबुराम लगायतका नेताहरूमा देखिएको समस्याका कारण माओवादप्रति प्रश्न उठ्ने गरे पनि अहिले पनि माओवाद जीवित रहेको उनले बताए । कार्यक्रममा नेकपा बहुमतका केन्द्रीय कार्यालय सदस्य हेमन्तप्रकाश वलीले पार्टी भित्र मुलुक रूपान्तरणको नयाँ बिचारको थालनी भइसकेको भन्दै यसलाई निष्कर्षमा पुराउने बताए ।