काठमाडौं । गृहमन्त्री दावी गर्दै आएका राष्ट्रिय स्वतन्त्र पार्टी (रास्वपा) का सभापति रवि लामिछानेले आजै प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीलाई भेटेका छन् ।
आइतबार बिहान एमाले अध्यक्ष ओलीललाई भेटेलगत्तै प्रधानमन्त्रीसँग भेट्न उनी वालुवाटार पुगेका हुन् । गृहमन्त्री नपाए सत्ताबाट बाहिरिने धम्की दिँदै आएका रवि लामिछानेले अझै प्रधानमन्त्री प्रचण्डसँग बार्गेनिङ गरिरहेका छन् । रवि लामिछानेले केही दिनयता गृहमन्त्री नपाएमा सरकारबाट बाहिरिने बताउँदै आएका छन् । तर, उनले अझै बार्गेनिङ गर्न छाडेका छैनन् ।
गृहमन्त्री नपाए शनिबार नै सरकारबाट बाहिरिने रवि लामिछानेले बताएका थिए । तर, प्रधानमन्त्री प्रचण्ड र एमाले अध्यक्ष ओलीले गृहबाहेक अरु मन्त्रालय प्रस्ताव गरेपछि साँझ ८ बजे रास्वपाको आकस्मिक बैठक बसेको थियो । तर, बैठक विनानिष्कर्ष टुंगिएको थियो ।
यस्तै, विशेष निर्णय लिन भन्दै रास्वपाले आज केन्द्रीय समिति बैठक र संसदीय दलको बैठक बोलाएको छ । बैठक बस्नुअघि रवि लामिछाने प्रधानमन्त्री प्रचण्डलाई भेट्न बालुवाटार र एमाले अध्यक्ष ओलीलाई भेट्न बालकोट पुगेका हुन् । प्रचण्डलाई भेट्न जानुअघि रविले एमाले अध्यक्ष ओलीलाई भेटेको रास्वपाका एक नेताले बताए ।
प्रधानमन्त्री प्रचण्ड र एमाले अध्यक्ष ओलीलाई भेटेपछि निर्णायक छलफल हुने ती नेताको भनाइ छ । सांसद पद गएपछि गैरसांसदको रूपमा गृहमन्त्री हुन पाउनुपर्ने भन्दै रविले प्रधानमन्त्री प्रचण्डलाई दबाब बढाएका छन् । यदि गृह मन्त्रालय नदिए सरकारबाट बाहिरिने चेतावनी उनको छ ।
तर, रविको पासपोर्टको मुद्दा किनारा नलाग्दासम्म मन्त्री बनाउन नसक्ने प्रधानमन्त्री प्रचण्डले अडान लिएका छन् । पछिल्लो समय उनका पार्टीका नेताहरुले समेत रविलाई मन्त्री नबनाउन प्रचण्डमाथि दबाब बढाउँदै आएका छन् । रवि लामिछाने नेतृत्वको पार्टीका अरू सांसदलाई गृहबाहेक मन्त्रालय दिन सकिने निष्कर्षमा प्रचण्ड पुगेका छन् ।
प्रतिक्रिया