मधेश प्रदेशसभा सदस्यको शपथ आज

जनकपुर । मधेश प्रदेशसभामा नवनिर्वाचित सदस्यहरुको शपथ ग्रहण शुक्रबार (आज) हुने भएको छ ।

गत पुस ११ गते भएको सर्वपक्षीय बैठक अनुसार नवनिर्वाचित प्रदेश सांसदहरुलाई शुक्रबार दिउँसो २ बजे पद तथा गोपनियताको शपथ ग्रहणको तालिका तय भएको थियो । प्रदेश सांसदहरुलाई प्रदेशसभाका जेष्ठ सदस्य गोविन्दबहादुर न्यौपानेले शपथ ग्रहण गराउने छन् । जेष्ठ सदस्यको हैसियतमा न्यौपानेलाई शुक्रबार प्रदेश प्रमुख हरिशंकर मिश्रले शपथ ग्रहण गराएका थिए ।

नेपालको संविधानको धारा १८२ को उपधारा (५), प्रदेशसभा सदस्य निर्वाचन ऐन, २०७४ को दफा ७५ बमोजिम ज्येष्ठ सदस्यको हैसियतले प्रदेशसभाको अध्यक्षता गर्ने प्रावधान छ । मधेश प्रदेशमा १०७ प्रदेशसभा सदस्यहरु रहेका छन् ।