विराटनगर । नेपाली कांग्रेस प्रदेश १ संसदिय दलको नेता छान्न शुक्रबार निर्वाचन हुने भएको छ ।
सहमतिको प्रयास असफल भएपछि निर्वाचन मार्फत संसदिय दलको नेता चयन हुने भएको हो । दलको नेताका चार जना आकाँक्षीले दाबी नछाडेपछि शुक्रबार निर्वाचन गर्नुपर्ने भएको हो । कांग्रेस संसदीय दलको नेतामाकेन्द्रीय सदस्य अमृत अर्याल, भीम पराजुलीसँगै प्रदेश १ सभापति उद्धव थापा र प्रदेश १ का आन्तरिक मामिला तथा कानुनमन्त्री केदार कार्की दाबेदार छन् ।
हिमाल कार्की पनि दलको नेताको आकाँक्षी हुन् । सोमबार भएको छलफलमा कसैले दाबी नछाडेपछि पुस १५ गतेका लागि निर्वाचन तोकिएको हो । निर्वाचनका लागि राष्ट्रियसभामा कांग्रेस संसदीय दलको नेता तथा कांग्रेस १ नम्बर प्रदेश समितिका उपसभापति रमेशजंग रायमाझीको संयोजकत्वमा निर्वाचन समिति गठन भएको छ ।
समितिले निर्वाचन कार्यतालिका पनि सार्वजनिक गरेको छ । बिहीबार मनोनयन दर्ताका लागि समय निर्धारण गरिएको छ । संसदीय दलको नेताले मनोनयन दर्ताका लागि २५ हजार रुपैयाँ शुल्क बुझाउनुपर्नेछ । बिहीबार नै उम्मेदवारको अन्तिम नामावली प्रकाशन गर्ने तयारी गरेको समितिले शुक्रबार विहान ९ बजेदेखि १० बजेसम्म मतदानको समय निर्धारण गरेको छ ।
प्रदेश १ को सभामा नेपाली कांग्रेसका २९ सांसद छन् ।
प्रतिक्रिया