काठमाडौं । उत्तरी अमेरिकामा बढेको चिसोका कारण हालसम्म ५६ जनाको मृत्यु भएको छ ।
चिसो सिरेटोसँगै हिमपात हुँदा जनजीवन प्रभावित भएको र चिसोकै कारण न्यूयोर्कमा मात्रै २८ जनाको ज्यान गएको अन्तराष्ट्रिय सञ्चारमाध्यमले जनाएका छन् । न्यूयोर्कको बफेलो शहर सबैभन्दा बढी प्रभावित भएको छ । त्यहाँका गभर्नरले अहिले युद्धको जस्तो स्थिति रहेको बताएका छन् । गभर्नर क्याथे हुचेलले भनेकी छन्, ‘बफेलो शहरका लागि यो इतिहासकै विनाशकारी हो ।
प्रकृतिले आफूसँग भएका सबै कुराले हामीलाई प्रहार गरिरहेकी छन् ।’ सरकारी अधिकारीहरुले अत्यावश्यक नपरी घर बाहिर ननिस्किन सुझाव दिएपनि एरी काउन्टीमा १२ जना मानिसहरु घरभित्रै र गाडीभित्रै मृत फेला परेको जनाइएको छ । अन्तराष्ट्रि सञ्चारमाध्यमका अनुसार ओन्टारियो, मोन्टाना, क्युबेक, भर्मन्ट, ओहायो, मिजुरी, विस्कन्सिन, क्यान्सस, कोलोराडो लगायतका क्षेत्रहरुलाई चिसो प्रभावित क्षेत्रको रुपमा राखिएको छ ।
मोन्टानामा न्युनतम तापक्रम माइनस ४५ डिग्री सेल्सियस मापन भएको छ । हिमपात क्यानडादेखि मेक्सिकोको सिमानासम्म फैलिएको छ । क्यानडाको कोलम्बिया प्रान्तमा बरफ जमेको सडकमा बस चिप्लिएर दुर्घटना हुँदा चार जनाको ज्यान गएको छ । हिउँले सडकहरु अवरुद्ध छन् भने सयौं उडानहरु रद्द गरिएको छ ।
केही स्थानमा विद्युत आपूर्ति पनि बन्द भएको छ । यद्यपी मौसमविदहरुले भने हिमपात र चिसो केही दिनमा कम हुने बताएका छन्
प्रतिक्रिया